Felles høyringssvar: Nye havvindområde

Nyhende

Innspel til strategisk konsekvensutgreiing for havvindområde

Haugalandsrådet og Sunnhordlandsrådet representerer følgjande kommunar:
Utsira, Karmøy, Haugesund, Bokn, Tysvær, Vindafjord, Sauda, Sveio, Etne, Bømlo, Stord, Fitjar, Austevoll, Tysnes og Kvinnherad.
Me representerer storregionen mellom Stavanger og Bergen, og har følgjande felles uttale til konsekvensutgreiinga for havvindområde.

Sunnhordland og Haugalandet sin nærleik til havvindfelta (Utsira Nord, Vestavind F og Vestavind E) gir moglegheiter for å finne gode, samordna løysingar for areala, samt å sikre god og berekraftig forvaltning av havområda ved utbygging og ilandføring av kraft til Haugalandet.

Me viser til tidlegare høyringssvar frå Haugaland Vekst knytt til strategisk konsekvensutgreiing del 1.
I tillegg har me følgjande innspel:

Kraft

NVE vurderer Vestavind E som mindre teknisk-økonomisk eigna for havvind samanlikna med andre utgreiingsområde, og peiker særleg på at avstanden til land vil føre til høgare kostnader for nettilknyting enn for andre område.
NVE vurderer at det ikkje vil vere gunstig å tilknyte ytterlegare havvind til Haugalandet samanlikna med andre nettområde.

Samtidig peiker NVE på at ei eventuell utbygging av Vestavind E bør sjåast i samanheng med Vestavind F, som blei tilrådd opna i del 1 av den strategiske konsekvensutgreiinga.
Utgreiinga inkluderer ikkje vurderingar av teknisk-økonomisk eignaheit eller konsekvensar ved utbygging av fleire nærliggande havvindområde.

For å sikre ei berekraftig og teknisk-økonomisk forsvarleg utbygging av havvind, er det viktig å ha ei heilskapleg tilnærming til utviklinga på norsk sokkel.
Konsekvensutgreiinga har vurdert kvart felt isolert – det er ei klar svakheit.
Det finst mange synergiar i å sjå norsk havvindutbygging i eit heilskapleg og langsiktig perspektiv – og samordning er avgjerande.

Sunnhordland og Haugalandet, som energi- og industriregionar med store utviklingsplanar knytt til det grøne skiftet, har eit dokumentert behov for meir kraft.
Dei to regionane har felles transmisjonsnett, og Statnett sine områdeplanar viser at det er ledig kapasitet.

Både Sunnhordlandsregionen og Haugalandsregionen er positive til at krafta blir ført i land på Haugalandet.
Me oppmodar om at Vestavind E vert vurdert i samanheng med Utsira Nord og Vestavind F.
Me ønskjer også at Statnett igjen får ansvar for å greie ut moglegheiter for samordna ilandføring av kraft til Haugalandet.

Fugle- og dyreliv

Konsekvensutgreiinga peiker på mogleg alvorlege verknader på trekkfugl, sjøfugl og flaggermus, og viser til vesentlege kunnskapshol.
Det bør gjennomførast grundige undersøkingar for å styrkje kunnskapsgrunnlaget og sikre effektive avbøtande tiltak.

Eit anna viktig tiltak vil vere å etablere eit følgjeforskningssenter på Utsira, mellom anna med fokus på fugl og dyreliv.
Med si geografiske plassering, store artsmangfald, etablerte fuglemiljø og høge kompetanse, er Utsira ein ideell stad for eit slikt senter i den norske satsinga på havvind.

Medverknad

For å få aksept for utbygging i den skalaen som er planlagt, er det viktig å oppnå lokal aksept gjennom god sameksistens.
Det er avgjerande at ansvaret for involvering av innbyggjarane ligg hos nasjonale styresmakter, ikkje berre hos konsortia.
Det vil sikre at prosessen blir nøytral, strukturert og rettferdig for alle partar.

Sunnhordlandsrådet og Haugalandsrådet er positive til fleire havvindfelt, og ønskjer å bidra til å finne gode løysingar i samarbeid med Energidepartementet, NVE, relevante aktørar og framtidige utbyggjarar.
Vi ser fram til vidare konstruktiv dialog om korleis Utsira Nord, Vestavind F og Vestavind E kan utviklast på ein berekraftig måte som skaper verdi for Noreg.

Med venleg helsing
Sigmund Lier – Dagleg leiar, Haugalandsrådet IPR
Tora Haslum Myklebust – Dagleg leiar, Sunnhordlandsrådet IPR