Haugalandsrådet og Sunnhordlandsrådet står samla om nye havvindområde
Haugalandsrådet og Sunnhordlandsrådet har levert eit felles høyringssvar til den strategiske konsekvensutgreiinga frå Energidepartementet for nye havvindområde. Bak står kommunane Utsira, Karmøy, Haugesund, Bokn, Tysvær, Vindafjord, Sauda, Sveio, Etne, Bømlo, Stord, Fitjar, Austevoll, Tysnes og Kvinnherad. Eit hovudpoeng i uttalen er kor krafta skal førast i land. Råda meiner at Haugalandet bør vere ilandføringspunkt, og […]
Haugalandsrådet og Sunnhordlandsrådet har levert eit felles høyringssvar til den strategiske konsekvensutgreiinga frå Energidepartementet for nye havvindområde. Bak står kommunane Utsira, Karmøy, Haugesund, Bokn, Tysvær, Vindafjord, Sauda, Sveio, Etne, Bømlo, Stord, Fitjar, Austevoll, Tysnes og Kvinnherad.
Eit hovudpoeng i uttalen er kor krafta skal førast i land. Råda meiner at Haugalandet bør vere ilandføringspunkt, og ber om at Statnett får ansvar for å greie ut ei koordinert løysing. Grunngjevinga er at Haugalandet og Sunnhordland deler transmisjonsnett, og at planane viser ledig kapasitet.
Ser områda i samanheng
Råda peikar på at nærleiken til felta Utsira Nord, Vestavind F og Vestavind E gir store moglegheiter for heilskaplege løysingar. Dei meiner områda ikkje kan vurderast isolert, men må sjåast i samanheng for å sikre lågare kostnader, meir effektiv utbygging og betre utnytting av nettet.
I høyringssvaret peikar råda på at Vestavind F, utanfor Rogaland, ligg nær kysten og blei tilrådd opna av NVE i første del av utgreiinga. Vestavind E, som ligg over femti kilometer frå land utanfor Vestland, vil vere meir kostnadskrevjande å knyte til nettet. NVE har samtidig understreka at Vestavind E bør vurderast i samanheng med Vestavind F.
Utsira Nord blir trekt fram som eit sentralt område. Det er allereie opna for utbygging, og er plassert tett på dei to Vestavind-felta. Råda meiner dette forsterkar behovet for samordna planlegging av heile havvindklynga i Nordsjøen.
Utsira som kunnskapssenter
Når det gjeld natur og miljø, peikar råda på store kunnskapsmangel, særleg om sjøfugl, trekkfugl og flaggermus. Dei foreslår å etablere eit følgjeforskningssenter på Utsira, som har ei unik plassering midt i fugletrekket og eit eksisterande fagmiljø som kan byggjast vidare på.
Råda understrekar også at tidleg og nøytral involvering av innbyggjarane er avgjerande for å sikre aksept i befolkninga. Dei meiner dette ansvaret må liggje hos nasjonale styresmakter, og ikkje overlatast til framtidige utbyggjarar.
I høyringssvaret konkluderer Haugalandsrådet og Sunnhordlandsrådet med at dei er positive til havvindutbygging, men at utviklinga må vere berekraftig, basert på solid kunnskap og samstundes bidra til verdiskaping både nasjonalt og regionalt.
Pressemelding frå Haugalandsrådet og Sunnhordlandsrådet 30.09.2025