Inspirerande reiselivssamling og årsmøte for Visit Sunnhordland

Nyhende

Måndag og tysdag denne veka arrangerte Visit Sunnhordland årsmøte og reiselivssamling på Haaheim Gaard.

Det vart 2 dagar med inspirasjonspåfyll og workshop med Sunnhordland som heilårsdestinasjon som tema.  

Årsmøte og gode innlegg

Første dag av samlinga starta med velsmakande og god lunch på Haaheim Gaard, etterfulgt av årsmøte. Reiselivsansvarleg Hilde Eide Helland losa oss gjennom årsmøtesakene.

Etter dette var det innlegg både av Matarena AS, Sunnhordland Adventure, Bu i Sunnhordland, Sunnhordland UNESCO Geopark samt styringsgruppeleiar i Visit Sunnhordland, Torstein Hatlevik. Fokus var Sunnhordland heile året, bu- og besøkslyst og berekraft.

Gardsbesøk med ostesmaking

Ein av dei mange flotte reiselivsaktørane på Tysnes er Myrdal Gård. Nynke og Jasper van Schaik har tatt med seg den velkjende nederlandske ostetradisjonen som dei kombinerer med lokale råvarer. Deltakarane på reiselivssamlinga fekk både smake på prisvinnande ostar og sjå produksjonslokale. Meirsmak og inspirasjon!

Workshop: Sunnhordland heile året

På dag to var det heilårsdestinasjonen Sunnhordland som sto på programmet. Dagleg leiar i Region Sunnhordland leia workshopen. Mange spennande og gode forslag kom opp, og dette tar me med oss vidare i arbeidet for sesongutviding.