Kommuneutvikling i ei uroleg tid – dette sto på agendaen på formannskapskonferansen i Sunnhordland
6. mars arrangerte Sunnhordlandsrådet formannskapskonferanse på Stord hotell. Gjennom innlegg frå statleg, regionalt og kommunalt nivå vart tema som beredskap, kommunale oppgåver fram mot 2040, inkludering og regional utvikling løfta fram.
Konferansen samla formannskapa og deltakarar frå kommunane Austevoll, Bømlo, Etne, Fitjar, Kvinnherad, Stord, Sveio og Tysnes. Gjennom dagen vart det halde innlegg og samtalar om mellom anna beredskap, kommunale oppgåver fram mot 2040, utanforskap og regional utvikling.
Rådsleiar i Sunnhordlandsrådet og ordførar i Bømlo kommue, Morten Helland, opna konferansen.
Kommuneutvikling i ei uroleg tid
Første del av konferansen handla om det overordna biletet for kommuneutvikling i ei uroleg tid.
Rune Bakervik, stortingsrepresentant og medlem i utanriks- og forsvarskomiteen, innleidde om det overordna biletet. Han viste til verdsbiletet me er i, og drog liner både på europeisk, nasjonalt og regionalt plan.
Deretter heldt Haavard Stensvand, beredskapssjef hos Statsforvaltaren i Vestland, innlegg om kommunane og beredskap med fokus på å dra i same retning.
Kommunale lovpålagte oppgåver fram mot 2040
Andre del av konferansen tok for seg kommunale oppgåver i åra framover.
Frode Kyrkjebø frå KS heldt innlegg om kommuneøkonomi fram mot 2040, med vekt på lovpålagte oppgåver og prioriteringar. Han viste til det økonomiske handlingsrommet kommunane har, og kjem til å ha i åra framover sett i lys av demografiutviklinga.
Lene Engebø, tenesteleiar for helse og velferd i Kinn kommune, presenterte døme frå eigen kommune, der ho viste til kva utfordringsbilde dei står i, og korleis dei jobbar med dette.
Marcus André Berntzen Askildsen, leiar i Vestland ungdomsutval, snakka om kva forventningar dagens unge kan ha til kommunale tenester i 2040. Han viste også til viktigheita av tillit til kommunen, og tilknytinga dei unge har til denne.
Utanforskap og inkludering
Etter lunsj handla programmet om utanforskap og inkludering.
Bård Sandal frå Vestland fylkeskommune presenterte satsinga Inkludering i Vest. Her viste han til at det skal utformast nye tiltak.
Det vart også arrangert ein panelsamtale om korleis ein kan sikre at ulike former for utanforskap blir ivaretatt. I panelet deltok Bård Sandal (Vestland fylkeskommune), Marcus André Berntzen Askildsen (Vestland ungdomsutval), Morten Helland (ordførar i Bømlo), Håvard Lægreid (NAV) og Mariann Jacobsen Hilt (kommunedirektør i Stord).
Deltakarar: Mariann Jacobsen Hilt (kommunedirektør Stord), Håvard Lægreid (NAV), Morten Helland (ordførar Bømlo ), Marcus André Berntzen Askildsen (Vestland ungdomsutval), Bård Sandal (Vestland Fylkeskommune)
Moderator: Anlaug Rygg Svensen (t.v. i biletet), inkluderingsrådgjevar NAV Sunnhordland
Panelsamtalen vart leia av Anlaug Rygg Svensen, inkluderingsrådgjevar i NAV Sunnhordland.
Regional utvikling
Siste del av konferansen handla om regional utvikling og Vestland fylkeskommune si rolle.
Her deltok Robert Rastad, fylkesdirektør i Vestland fylkeskommune og May-Britt Nesje Hernes, seksjonsleiar for plan, klima og analyse.
Avslutningsvis orienterte Hogne Haugsdal, kommunedirektør i Austevoll, om status for strategiplanen til Sunnhordlandsrådet.
Konferansen vart oppsummert av Morten Helland, rådsleiar i Sunnhordlandsrådet.
Årets innleiargåver vart gitt til organisasjonen Fritt Ukraina, som arbeider med støtte til Ukraina.
Sunnhordlandsrådet takka innleiarane for bidraga til konferansen.