Pressemelding: Sunnhordlandsrådet løfta viktige regionale saker i møte med regjeringa og Hordalandsbenken
Sunnhordlandsrådet har denne veka vore i Oslo og gjennomført ei rekkje møte med sentrale styresmakter. I løpet av 13 og 14. januar har rådet hatt møte med heile ti ulike departement, i tillegg til Hordalandsbenken på Stortinget.
– Dette har vore to svært viktige og innhaldsrike dagar for Sunnhordland. Me har fått løfta fram dei største utfordringane kommunane våre står i, direkte til politisk og administrativ leiing i regjeringa, seier Morten Helland, ordførar i Bømlo og leiar for Sunnhordlandsrådet.
Blant sakene som vart tekne opp var samferdsel, kraft- og nettsituasjonen i regionen, rammevilkår for havbruk og næringsliv, kommunal økonomi, bustadpolitikk, beredskap og samfunnstryggleik, samt store utfordringar knytt til helse, barnevern og integrering av flyktningar. Rådet peika særleg på konsekvensane for små og mellomstore kommunar, og behovet for meir føreseielege statlege ordningar.
Nett- og energikapasitet i Sunnhordland vart løfta fram som viktig å ha fortsatt fokus på i møte med Energidepartementet, der behovet for raskare nettutbygging og betre insentiv for utnytting av eksisterande kapasitet vart understreka. I møte med Fiskeri- og havministeren var samordning av forvaltninga rundt havbruk eit hovudtema, medan møta med Helse- og omsorgsdepartementet handla om ressurskrevjande brukarar, legesituasjonen og økonomisk berekraft i kommunale helsetenester.
– Me opplever at bodskapen vår vart lytta til, og at departementa har fått eit betre bilete av korleis nasjonal politikk slår ut i ein distriktsregion som Sunnhordland, seier Helland.
Møtet med Hordalandsbenken samla brei deltaking frå kommunane i regionen. Her vart mellom anna samferdsel, beredskap, kommunen si rolle som samfunnsutviklar og krisesentertilbodet i regionen drøfta.
Sunnhordlandsrådet vil no følgje opp møta vidare, både politisk og administrativt.
– Dette er ikkje eit eingongsbesøk. Me må sikre at Sunnhordland er «på kartet» i Oslo. Målet er å sikre betre rammevilkår for innbyggjarane, næringslivet og kommunane i Sunnhordland på lang sikt, avsluttar Helland.
Bildet: Dagleg leiar Tora Haslum Myklebust og rådsleiar i Sunnhordlandsrådet, Morten Helland
Møta vart halde i Stortingsbygningen (foto over) og det nye regjeringskvartalet (foto til venstre).